Ůӟó

Fel myfyriwr llawn amser byddwch yn cael eich tiwtor eich hun a fydd yn cyfarfod â chi i adolygu eich datblygiad academaidd, darparu cymorth, cynnig arweiniad ac anogaeth i sicrhau eich bod yn cwblhau holl agweddau eich cwrs yn llwyddiannus. Yn ogystal â gofalu am eich iechyd a’ch llesiant cyffredinol a bod yn rhywun gallwch ymddiried a dibynnu arnynt, byddant hefyd yn eich paratoi ar gyfer eich camau nesaf yn y coleg, y brifysgol neu gyflogaeth.

Gall pob myfyriwr yn Ůӟó ddefnyddio ein llyfrgelloedd. Ym mhob canolfan mae yna lyfrau, cyfnodolion, e-lyfrau a DVDs, a gallwch ddefnyddio’r cyfrifiaduron neu gysylltu eich dyfais eich hun â’n Wi-Fi am ddim. Mae’r staff wrth law i’ch helpu i ddod o hyd i adnoddau a chael gafael ar wasanaethau eraill megis llungopïo, lamineiddio a rhwymo, ac mae arbenigwyr ar gael i’ch helpu i ddatblygu eich sgiliau llythrennedd, rhifedd a TGCh yn ogystal â’ch sgiliau astudio, gan gynnwys deall aseiniadau, chwilio am wybodaeth a chwrdd â therfynau amser.

Mae gan bob cyfrifiadur myfyrwyr feddalwedd hygyrchedd, yn cynnwys:

• Microsoft Immersive Reader – technoleg gynorthwyol Testun i Leferydd, ar gael yn Word, Teams ac One Note, ac ar gael yn PowerPoint yn fuan.
• Apiau EdTech fel Canvas a Wakelet – cadwch lygad am eicon Immersive Reader.
• Mynediad at eLyfrau technoleg gynorthwyol drwy Borth y Dysgwr – dangosfyrddau ‘Sut i’ a ‘Gwybodaeth’. Mae gan yr eLyfrau swyddogaeth ‘Darllen i mi’.

Gall myfyrwyr hefyd gwrdd â’r hyfforddwr technoleg gynorthwyol i gael hyd yn oed mwy o opsiynau hygyrchedd, gan gynnwys:

• MS Lens – cymhwysiad Testun-i-Leferydd sy’n darllen taflenni gwaith a llyfrau yn uchel.
• Gauth AI – cydymaith astudio sy’n dadansoddi gwaith ac hafaliadau yn gamau mwy rheoliadwy.
• Headspace ap ymwybyddiaeth ofalgar a myfyrdod sy’n arwain myfyrwyr drwy ymarferion i leihau straen a gorbryder, ac i wella cwsg.
• LeeLoo cymhwysiad cyfathrebu amgen a chynorthwyol (AAC) a System Cyfnewid Lluniau (PECS), wedi’i gynllunio i helpu unigolion di-eiriau, yn enwedig plant ag awtistiaeth ac anhwylderau lleferydd eraill, i gyfathrebu ag eraill.

Dim ond cipolwg yw hyn ar yr hyn sydd gan yr hyfforddwr technoleg gynorthwyol a’r Coleg i’w gynnig.

Efallai y gallwch gael cymorth ychwanegol yn ystod arholiadau – dywedwch wrth eich tiwtor os ydych wedi cael trefniadau mynediad ar gyfer arholiad o’r blaen (er nad yw trefniadau a ddyfernir yn yr ysgol yn cael eu rhoi yn awtomatig yn y coleg).

Gallai trefniadau mynediad fod yn amser ychwanegol, ystafell ar wahân, mynediad at ddarllenydd, ysgogwr, ysgrifennydd, defnyddio cyfrifiadur, neu gyfuniad o’r rhain neu argymhellion eraill.

I ddysgwyr sydd â materion gorsensitifrwydd, sy’n dioddef o orbryder neu’n ei chael yn anghyfforddus i ddefnyddio cyfleusterau ffreutur prysur, mae gan bob campws ardal dawel i’w defnyddio amser egwyl ac amser cinio.